دشن صباح اليوم قداسة البابا تواضروس الثاني كنيسة العذراء ومارمينا سانت كرانستون برود أيلاند. المذابح التي تم تدشينها بيد قداسة البابا اليوم، المذبح الأوسط على اسم القديسة العذراء مريم والقديس مارمينا العجائبي ومذبح على اسم الملاك ميخائيل والملائكة والسمائيين ومذبح على أسم الشهيد مار جرجس وجميع القديسين ومذبح على اسم القديسة العذراء مريم والقديس يوسف النجار.والمذبح الأخير على اسم القديس البابا كيرلس السادس.
كما تم تدشين أيقونات كنيسة العذراء ومارمينا برود آيلاند والمعمودية الخاصة بها على اسم القديس يوحنا المعمدان.
أشاد قداسة البابا بتصميم الكنيسة بملامح التقليد القبطى الأرثوذكسي ويشكر كل من قام على هذا العمل الرائع قائلاً:
” اليوم تذكار تدشين كنيستكم المباركة وصار معروف مثل عيد محلى تحتفلوا به كل سنة الأحد الأول من السنة القبطية بتدشين كنيستكم الجميلة والحقيقة كنيستكم جميلة ورقيقة وبها الطابع القبطى الجميل وفيها الطابع الفنى الرقيق والاتساع الكبير والديكور المميز ربنا يعوض أبونا مرقس ويعوض نيافة الأنبا دافيد ويعوض أبونا أبانوب وكل الأراخنة والمهندسين وأنا عارف ان الكنيسة دى لها تاريخ وقصة ارجو ان تسجلوا هذا التاريخ وعارف ان لما البابا شنودة كان بيجى يزور هنا فى الكنيسة الصغيرة كان يسميها الكنيسة الجميلة وشيء جميل ان كنيستنا تكون جميلة لأننا بنصلى دائمًا ونقول “كما فى السماء كذلك على الأرض علشان كدة الكنيسة لازم تكون بارعة الجمال ودى حاة تفرح أن كنيستكم متسعة وبها مذابح كثيرة وجميلة والكنيسة منورة ربنا يعوض المهندسين وهذه واحدة من أجمل الكنائس التى زورتها مش فى امريكا بس بل فى أماكن أخرى كثيرة والكنيسة هنا تأخذ مرتبة متقدمة فى جمالها والأهم كمان ان الكنيسة بالطقس القبطى اول ما الواحد يشوفها من برة يقول دى كنيسة قبطية وتدخلها تجد كل ملامح التقليد القبطى الأرثوذكسي الذى بدئت به كنيستنا المصرية منذ 2000 سنة مبروك عليكم تدشين المذابح المذبح الأوسط على اسم العذراء والشهيد مارمينا ومذبح على أسم الملاك ميخائيل والملائكة والسمائيين والمذبح على أسم مارجرجس والشهداء وبعدين مذبح الكنيسة الصغيرة على أسم العذراء والقديس يوسف النجار وهنا على اسم البابا كيرلس يابختكم بكل هؤلاء القديسين والمعمودية على أسم يوحنا المعمدان بجوار الأيقونات الجميلة التى بتزين كنيستنا وبتقدم التاريخ والتراث من خلال هذا الفن والجمال كمان الايقونات الشرقية الايقونة الشلاقيه بنسميها ايقونة ضابط الكل وجميلة وفيها مناظر من سفر الرؤيا سوأ بحرى او قبلى والكنيسة كلها على بعضها جميلة جدًا وتاخذ عشرة على عشرة ربنا يعوض التعب نيافة الأنبا دافيد واحنا جايين فى العربية كان بيحكيلى كثير عن أبونا مرقس وتعبه وأصراره وان لازم يعمل حاجه جميلة وأبونا مرقس حكالى أزاى بدء من عشرون سنة وأزاى الأجراءات أخذت وقت طويل جدًا لكنا ربنا فى الأخر فرحكم وفرحنا وباركلكم فيها ودى أجمل حاجة فى الكنيسة الشمامسة الصغيرين والبنات الصغيرين وانتم الكبار عملتوا هدية جميلة خالص لبناتكم وأولادكم اللى هيكبروا ويبقوا شباب هنا فى الكنيسة دى برافوا عليكم ربنا يباركم ويبارك حياتكم .
ثلاثة مبادئ فى أول أحد من السنة القبطية الجديدة
” أطلب ملكوت السموات و أحترس من خطية تبرير الذات ، صلى بأستمرار وأطلب الحكمة “
عظة قداسة البابا بكنيسة القديسه العذراء مريم والشهيد مارمينا العجايبي سانت كرانستون رود ايلاند
باسم الآب والابن والروح القدس الإله الواحد آمين. تحل علينا نعمته ورحمته من الآن وإلى الأبد آمين .
” هذا يوم ويوم أبتهاج أولًا هذا اليوم يوم أحد ونحن نعلم أن يوم الأحدد هو العيد الأسبوعى الذى نحتفل فيه كل أحد بتذكار قيامة ربنا يسوع المسيح كمان النهاردة الأحد الأول فى السنة القبطية سنة الشهداء الجديدة ١٧٣٥ ش ودى اول أحد فى السنة وزى ما أنتم عارفين السنة القبطية فيها ٥٢ أحد وأحاد السنة القبطية كلها مسلسلة فى أحاد السنة القبطية اللى بنقرأها فى القداسات والاناجيل المقدسة و نشكر ربنا انه بيعطينا نعم جديدة فى كل صباح وانه بيفرح قلبنا دائمًا وبيعطينا وزى ما بقول لكم النهاردة الأحد الأول فى السنة القبطية الجديدة والقداس والانجيل بيقدموا لنا جميعًا رسالة جديدة ده أول احد هعمل ايه تقوم النهاردة الكنيسة تختار جزء من الكتاب المقدس من أنجيل معلمنا لوقا بيتكلم عن 3 مبادئ .
المبدأ الأول : أطلب ملكوت السموات أولًا وأخيرًا
اول حاجه بيتكلم عن شخص عظيم جدًا وهويوحنا المعمدان وبيقول ان يوحنا المعمدان هو أعظم مواليد النساء كلكم عارفين حكاية يوحنا المعمدان ، لكن الأصغر منه فى ملكوت السموات أعظم منه عايز يقولنا وانت فى بداية السنه حدد الهدف بتاعك وهدفك ان يكون لك نصيب فى ملكوت السموات جمال مسيحيتنا يا أحبائى ان واحنا على الأرض بنفكر فى نصيبنا فى السماء وبنفكر فى مكانك وفى حلاوة السماء وفى اول السنة القبطية لازم تحط هدف لحياتك وهو ملكوت السماء انت هتقول انا صغير وعندى خطايا كثيرة هو صحيح يوحنا المعمدان أعظم مواليد النساء لكن الاصغر منه فى ملكوت السموات أعظم منه بيديلك رجاء وزى ماقولنا اثناء الصلاة بلدكم اسمها” hope” يعنى أمل او رجاء واسم جميل ، وانت بتجاهد فى حياتك فكر ايضًا فى السماء احنا ممكن ندرس ونشتغل ونكون أسرة ونخلف أولاد وبنات ونفرح بهم ونجوزهم أو نكرسهم او نرهبنهم كل ده حلو بس بقى انك دائمًا تفكر فى نصيبك السماوى وأنتم حضراتكم لما بتيجوا تصلوا تقولوا يارب احفظ نصيبى فى السماء خلى هدفك السماء دائمًا قدامك والواحد ممكن يعيش حياته بالطول والعرض ولكن فى النهاية لا يجد له نصيب فى السماء .
المبدأ الثاني : تحذير من خطية تبرير الذات
فى ناس دائما يبرروا لنفسهم عايشين فى خطية تبرير الذات يعنى واحد شايف نفسه صح على طول ولا يشعر بأنه خاطى أبدا مثل “أيوب الصديق ” هو كان مجتهد فى حياته ويقدم ذبائح بأستمرار عن ولاده وفى يوم تعرض لتجربه شديدة فوقف قدام ربنا وقال له أنا غلطت فى ايه ؟؟ انا بعمل كذا وكذا وفى الأخر لما تقرأ سفر أيوب تجد أن خطيته أنه كان دائمًا يرى نفسه صح ولا يخطيء أبدًا ويقول”آية (أي 42: 5): بِسَمْعِ الأُذُنِ قَدْ سَمِعْتُ عَنْكَ، وَالآنَ رَأَتْكَ عَيْنِي. “
وأيوب كان عايز يقول ان قبل كده كنت بعرفك بأذنى لكن دلواقتى عرفتك بقلبى ولما فاق من الخطية ربنا عوضه بكل شيء ونسميه “أيوب الصديق ” أوعى تبرر لذاتك عارفين الطفل الصغير لما بيمسك كوباية ويمشى بها ويتخبط فالكوباية تقع تتكسر ولما يسألوا يقول اصل هى اللى أتكسرت وكأن الكوباية نطت من أيده وأتكسرت والحق انه صغير ومأخذش باله ولسه بيتعلم ، اوعى تبرر ذاتك أكشف نفسك بأستمرار وفى أعترافاتك أكشف ضعفك وفكر ضرورى فى خطايا فكرة نظرة حكاية سقطه خطايا الأنسان القلب يطهر نفسه منها حتى يستحق الأية الجميلة اللى بتقول ” آية (مت 5: 8): طُوبَى لِلأَنْقِيَاءِ الْقَلْبِ، لأَنَّهُمْ يُعَايِنُونَ اللهَ. “
المبدأ الثالث : صلى بأستمرار أن يعطيك الله دائمًا الحكمة فى حياتك
ايه اكتر حاجه محتاجينها فى السنه الجديدة الكتاب قال النهاردة ان أكثر شيئ نحتاجه هو الحكمة ويعرض مشهد من مشاهد الحياة القديمة آية (مت 11: 17): وَيَقُولُونَ: زَمَّرْنَا لَكُمْ فَلَمْ تَرْقُصُوا! نُحْنَا لَكُمْ فَلَمْ تَلْطِمُوا! ” يعنى قولنا يوم فرح فلم تعبروا وقولنا يوم حزن لم تقدموا دمعة من عينيك فى أنسان بأستمرا معندوش حكمة لا فى الكلام ولا المواقف ولا حل المشكلات الحكمة هى شخص ربنا يسوع المسيح وكل ماتقرب للمسيح تجد حكمة والجواب اللين يصرف الغضب أحيانًا الواحد يسمع كلمة صعبة كدة كلمة تجرح تزعل اة تضايق وفى واحد كامه حلو مملح وزى ما الكتاب بيقولنا ياترى كلامك كويس وأفعالك حكيمة ياترى بتكسب اللى حواليك وتتعامل معهم معاملة كويسة وتكسبوا أولادكم وبناتكم ولأدائمًا فى حالة من عدم الحكمة كون أنسان حكيم ، فى يوم من الأيام كان فى مجلس من الناس الكبار واثنين صغيرين بدئوا يتشاجروا ويعلوا صوتهم فوقف شيخ وقور وسطهم كلهم يا أحبائى بتتخانقوا على ايه واحد فيكم الدقيق وواجد المياة ومن الدقيق والميه نعمل فطيرة حلوة وأول ماسمعوا هذا الكلام هدئوا وقام واحد من الحاضرين قال للشيخ وانت كلامك زى السكر اللى بنضعه على الفطير الحلو ، كن حكيم وأكسب الأخرين وكان فى أم عندها أولادها كلهم صبيان وأشقياء فجاتلى وبسألها عن ولادها فبقولها ولادك ولسه هقول كلمة حلوة قالت ولادى وقالت كلمة صعبة جدًا من شقواتهم يعنى فقولتلها اه ولادك مش بس ملائكة لأ دول كمان رؤساء ملائكة وهى مش مصدقة هو حد يقول على أولاده كلمه مش حلوة علشان كده وأنت فى أول السنة خلى صلواتك أعطينى يارب حكمة فى كلامى ومشاكلى ومعاملاتى مع الناس
يعنى أنجيل هذا الصباح به ثلاثة مباديء رئيسية
+ أطلب ملكوت السموات أولًا وأخيرًا
+ أحترس من خطية تبرير الذات
+ صلى بأستمرار وقوله يارب أعطنى دائمًا الحكمة فى حياتى
ربنا يبارك حياتكم ويحفظكم ويبارك نيافة الأنبا دافيد فى خدمتة وايبارشيته الواسعة ويبارك الأباء الأحباء فى هذه الكنيسة والأيبارشية ويبارك كل الشعب ويبارك أبنائكم وأولادكم فى مدارس الأحد اللى بيحضرو الخدمة هنا وبأستمرا بتكونوا عايشين وأنتم جوه الكنيسة طول ما انت حارس ابنك جوه الكنيسة الملائكة تحاوطه ونمارس حياتنا واكنيسة صمام أمان فى تربية بناتنا وأولادنا ربنا يبارك لكم دائمًا ومبروك عليكم كنيستكم الجميلة والكبيرة وزى ما كنيستكم جميلة يبقى كل واحد منكم له نفس جميلةأيضًا واحنا مع بداية السنة القبطية الجميلة نطلب من ربنا يعطينا نعمة وتكون حياتنا مرضية أمامه الى النفس الأخير لألهنا كل المجد والكرامة من الأن والى الأبد أمين .
وقد حضر عمدة مدينة سانت كرانستون تدشين الكنيسة وقام بتقديم مفتاح المدينة لقداسة البابا، أثناء حضوره للترحيب بقداسته بكنيسة العذراء ومارمينا التي تم تدشينها اليوم.
وقدم القمص مرقس جرجس هدية تذكارية لقداسة البابا من كهنة كنيسة العذراء ومارمينا برود آيلاند